Desiderata

Przełaź spokojnie bez larmo a niýciyrpliwoś,

a pamiyntej, jaki pokůj idzie snojś we cichości.

Kej ýno idzie, bez ôdrzekanio siebie,

miyj dobry kůntakt ze wszyskimi.

Uosprawiej swoja prowda jaśnie a spokojnie,

a wysuchej inkszych, bali gupielokůw a ignorantůw;

Łůni tyż majům swoja uosprowka.

Chrůń sie ôd butelnych a napasztliwych,

sům łůni utropům dlo ducha.

Kej porůwnowujesz sie ze kimś inkszym,

mogesz sie stać dufny a zgůrzkniały,

bo zowdy snojdzie sie wtoś lepszy abo gorszy ôd Cia.

Raduj sie tym coś juże szafnůł,

ai tym co mosz we forplanie.

Szanuj sie swoja robota, nawet ta pomiyrno,

bo ôbojytnie coby sie miało dzioć, to Twůj fach je zowdy rýchtýczny.

Niý przepůmnij sie wachować we interesach,

toć we świecie je fol ôszklistwa.

Niých Ci to jednako niý przisłůni rýchtých wertu;

Mocka ludzi ciůngnie ku ideałům,

a we żywobyciu wszyndziý je fol heroizmu.

Bydź sobům;

Tym barzi niý udowej uczucio.

Ku tymu niý bydź cynikiym we przůniu;

Toć przi ôziymbłości a uozrzolyniu,

je łůna wiyczno choby trowa.

Przijm spokojnie dorada lot żywobycio,

a ze ôdwziynkům zrzeknij sie sprow młodości.

Uozwijej druk swojego ducha,

coby poradziůł cie ôchrůnić przi nogłym niýszczyńsciu.

Niý starej sie za tyla złym forsztelůnkym.

Chołda trwogi robi sie ze zmorzinio a ôdôsobniynio.

Przi trzimaniu dobrego ordnůngu,

Bydź dlo siebie łagodny.

Je żeś bajtlym cołkigo wszechświota,

niý myni jak strůmy a gwiozdy;

Mosz recht sam być.

A eli to je dlo Cia klar, eli niý,

Na zicher wszechświot je na dobryj drůdze.

Beztůż bydź pojednany ze PůnBůczkym,

kanyjaki Łůn dlo Cia je;

A kanyco robisz abo chcesz,

we butlowym garusie żywobycio,

zachowej pokůj ze swojům duszům.

Ze wszyskimi tymi ôszklistwůma, ciynżobům a sharatanymi marzyniůma,

to durś je piykny świot.

Bydź rod wszyskimu.

Ciůngnij ku szczyńściu.

Max Ehrmann, Desiderata

Przekłodoł: Bajslyrz