A A A

 

Jeszcze dobrze sie niý napoczyn nowy rok, a my juże dostali propozycjo sbajslowanio norychtůw ze ślůnskij godki. Tym razym ôdezwoł sie do nos Samorzůnd Sztudyncki Politechniki Śląskij, kery to bajslowoł latosi Forum Uczelni Technicznych. Je to zrzeszyniý Samorzůndůw Sztudynckich Uczelni Technicznych ze cołki Polski.

 

Beztuż, coby dobrze sie przirychtować do tego zadanio, ugodalimy sie na tref roboczy ze przedstowicielym Samorzůndu Sztudynckigo na Politechnice we Glýwicach. Uzdalimy tam co a jak bydymy robić, a uzgodnili forplan dziołanio.

Cołko idyjo bůła tako, coby przedstowicieli ze cołkij Polski prziwitać u nos sam na Ślůnsku tyż po ślůnsku a przedstowić im trocha ta noszo kultůra a godka. Jednako coby niý bůło to take ôklepane uzdalimy, iże przirychtujymy norychta ze umiyjyntności miynkich (z anglickigo "soft skills"). Bůła to tym barzi fajno idyjo, bo můglimy skorzystać ze materiałůw przirychtowanych juże we projekcie Silesia Skills. Dziynka tymu nortycha bůły po ślůnsku, jednako ze materiałami przitychtowanymi bez profesionalnych trynerůw (abo jako to z anglicka godajům - coach'ůw).

Dlo uczystnikůw przirychtowalimy Vademecum, kere bůło materiałami pomocniczymi do norychtůw. Vademecum dostali we wersji polskij (coby poradzili wiyncyj spokopić) ai po ślůnsku, coby zoboczyli, jako tako godka moge wyglůndać. Coby bůło im zaś lecyj poczytać, dostali tyż nodbytnio zakůny szkryflanio a czytanio po ślůnsku użyte we Vademecum.

No i prziszła sobota 27 stycznio. Tref sbajslowany uostoł we Mrowisku we Glýwicach, kaj wszyske przedstowiciele byli juże ôd rana. Nosze norychta usztalowane uostały na 17:00. Przirychtowoł żech szpecjalno prezyntacjo multimedialno po polsku, coby lecyj bůło wszyskim spokopić ô czym je godka. Bůło to ô tyla wożne, bo cołke norychta kludzůne bůły po ślůnsku.

Uczystniki nojprzůd posuchali ô kůmunikacji, cwekach we dziołaniu, formowaniu manszaftůw a uozwiůnzywaniu haji, ze zajty psychologiczno-prakticznyj. Bůła niý ýno teorio, nale tyż praktika. Nojlepij to sie chyba podoboł przikłod ze "suchaniym a przeglůndaniym facebooka jednocześnie". Tak sie wszyscy ôśmioli, co zdać sie můgło, iże kożdy wiy, ô czym je godka.

Po talij wykładowyj prziszoł czos na trocha luźniyjsze prakticzne zadaniý. Cołki łůnego cwek polegoł na tym, coby kożdo grupa (po 3 ludzi kożdo) przirychtowała jakoś krůtko uosprowka ô haji. Coby jednako niý bůło za leko, uosprowka miała być po ślůnsku. Jednako przirychtowalimy dlo ułatwiynio ekstra dykcjůnorz wyświytlůny na prezyntacji, a ku tymu mielimy jeszcze ksiůnżkowe dykcjůnorze, kej wtoś by potrzebowoł kereś słowo przetublikować.

Po kajś 15 minutach wszyscy byli fertich. Trza sam pedzieć kożdo grupa szkryfnyła cosik inkszego, kożdy tyż staroł sie jak umioł. Kreatiwności niý zabrahło żodnymu. A jako śmiało moga pedzieć, rada bůło suchać kożdyj ze tych ôsprowek. Chocioż trza tyż sam pedzieć, co bůło słychać, we keryj grupie bůł wtoś ze Ôpolo, abo cieszyńskigo.

Na kůniec, kej cołke norychta sie skůńczůły, napoczła sie jeszcze interesantno godka ze niýkerymi uczystnikami, nale to juże mono uostawiymy miyndzy nami;)