A A A

 Kulinaria po śląsku - ślůnsko kuchnia

Łůńskigo roka sbajslowali my norychta ze umiyjyntności miynkich (z anglickigo "soft skills") na Forum Uczelni Technicznych we Glýwicach. A skiż tego, iże bůły to norychta sbajslowane we formule Silesia Skills, poklůdzůne bůły po ślůnsku, ô czym wiyncyj poradzicie poczytać sam.

Trza pedzieć iże na prowda sie spodobały. Bo bajslyrze niý ýno nos za to pochowlili, nale pedzieli, iże zaś sie ôdezwiům.

I rýchtých. Latosi przedstowiciel Samorzůndu Sztudynckigo Politechniki Śląskij zapropůnowoł nům sbajslowaniý nostympnych norychtůw na latośno edycjo FUT. Bůł tref, bůły uzgodniynia, roztomajte idyje a forsztelunki. Bezmaś demokracyjnie wywelowano uostała idyjo ze kulinarnymi norychtami po ślůnsku. Miały łůne niý ýno pokozać ślůnsko kuchnia, nale tyż przibliżyć bezto naszo kultůra ai trodycje.

I tako rola bůła piyrszyj tajli norychtůw, kej to nosz ferajniok Michał pokludził prezyntacjo a przi tymu uosprowioł jako to wyglůndało downij, a jako teroski, czamu we niýdziela je nudel zupa, kluski, modro kapusta a rolada, a bez tydziyń můmy ajntopf. Pedzielimy im, czamu pierniki to sům ślůnske szpecjały, a kołocz to niý żodne polske ciasto drożdżowe. Bůły tyż todycje świůnteczne a jodło, kere wtedy sie rychtuje (moczka, makůwki, siymiyniotka). Przedstowilimy im jako wyglůndała downij ślůnsko kuchnia i czamu býfyj bůł akurat bioły a niý siwo-czorny, jak teroźnie niý roz sie widzi.

Tak po prowdzie to musiołech tera sam to pedzieć tak doś po krůtce, bo na norychtach bůło ô co wiyncyj godki. Coby zaś żodyn sie niý przepůmnioł za drap, mioł za zadaniý dować sie pozůr a suchać, bo na kůniec bůł krojcok, we kerym musieli ôdgadnyć co to dejmy na to je "Specjał śląski wytwarzany tutaj już od XII wieku, np. Legnicka bomba" abo "Zupa podana z makaronem", abo "Danie jednogarnkowe". Coby bůło im trocha lecyj, fragi mieli po polsku, jednako hasła mieli już wpisać po ślůnsku. Tak przi ôkazji, Wy wiycie? A mono chcecie zoboczyć eli docie rada ôdgadnyć wszyske hasła?

 

Potyn bůła pazua, coby trocha dychli, świyżym (no mono niý do kůńca świyżym, ale) luftym.

 

Jednako coby sie niý przepůmnieli prziś na drugo tajla noszych norychtůw, spůmnielimy na kůniec, iże po przerwie můmy do nich ekstra zadaniý.

szpajza - przepis

Źródło: achimgodej.pl

Kej udało sie juże wszyskich skuplować nazod, mielimy przirychtowane już "materiały" a "rekwizyty" do zadanio, kere na nich czekało. Spůmnielimy im na poczůntek, jake poradzi sie na ślůnsku trefić regiůnal desery a maszkety. Pedzielimy miyndzy inkszymi co to je szpajza, makrůny a kopa. I przepis na ta ôstatnio my im pokozali.

Kopa

 

Wszysko jednako bůło tak poukłodane, coby dobrze sie zmiarkowali, jako ta kopa robić, bo to bůło jejich zadaniý na nostympne půł godziny. Dostali składniki i proste zadaniý: Zrůbcie kopa, kero bydzie podano na ta, ô keryj wům ôsprawiołech. Proste pra? Na zicher interesant. Zresztům...co Wům sam byda godać abo szkryflać, jako im to wylazło. Zoboczcie sami: