A A A

2016 01

 

2016 01

 

ZAGRALI –ZEBRALI – WOŚP WE RUDZIE ŚLŮNSKI

 ZAGRALI –ZEBRALI – WOŚP WE RUDZIE ŚLŮNSKI

We Rudzie Ślůnski jak kożdego roka wolůntariusze Wielkiej Orkiestry Świątecznej Pomocy zbiyrali piniůndze na spůmoga. Jednako tyn 24. juże finoł tyj niýôbycznyj ôrkestry we Rudzie Ślůnski bůł doś interesantny. Czamu? Posuchejcie.

Modzi zaśpiywali bo jak nie my to kto. I w sumie niý ma sie co dziwować. Wto poradzi na 72 godziny przed sbajslować srogi finał WOŚP? A jednak..na spůntanie, nale udało sie a dziynka tymu we Rudzie Ślůnski sbajslowany uostoł 10 januara muzik finał Wielkiej Orkiestry Świątecznej Pomocy.

Leko niý buło, bo chocioż czosu mało, to jeszcze niý wszyscy poradzili sie ôd razu dogodać. Jednako kůniec kůńcůw, udało sie wszystkich

spiknůńć a zepnůńć wszysko na uostatni knefel. Na binie przi tyj ôkazji niý brahowało artystów barzi abo myni ze Rudům swiůnzanych.

Jednako niý to bůło wożne. Nojwożniyjsze, coby půmogać. A jako ludzie sami godali, kożdy złotek mo srogo moc. Bezto hołda wolůntariuszůw wylazło na cesty a do ludzi, coby dać im ôkazjo podarować nojmyńszo choby szpynda. Niý musieli sie przi tymu co starać ô to, iże tak ofyn lotajům ze piniůndzůma. Żodnymu sie nic niý stało, a biksy ze darůma trefiůły do porachowanio. Uzbiyrało sie jak kożdego roka niý mało. W sumie co sie dziwować. Jedyn woluntariusz to poradziůł nawet uzbiyrać we swoij biksie 1500 zł.

ORSZAK TRZECH KRÓLI – PO RUDZIE ŚLŮNSKI

6 januara kajniýkaj bajslowane sům Orszaki Trzech Króli, czyli tak po prowdzie marsze, kere spůminajům jako to do Christusa prziszło 3 Myndrcůw ze świota.

Świynto Trzech Krůli to jedne ze wożniyjszych we katolickim kościele. We cołki Polsce je wtedy fraj ôd roboty, a we parafiach bajslowane sům pochody na spůminka przibycio trzech myndrcůw, kerzi prziszli ôbejrzeć malyńkigo Jezusa.

Latosi we Rudzie Ślůnski ludzie przi śpiywaniu kolyndůw przemaszirowali ze parafie

św. Piusa X fůrt aże do Szkoły Podstawowy nr 30. Jako spůmino Farorz s tamtůnd, te wydorzyniý pokozuje, iże we ludziach dali je wiara. Take maszirowaniý pomogo ludziům zbliżyć sie do PůnBůczka a lepi przeżywać świynto Trzech Krůli.

Nojlepsze przi tymu je to, iże coby tam iś, niý trza buło ekstra biletów abo inkszych. Stykło chcieć, bo bajslyrze rada byli kożdymu, wto chcioł iś s nimi. Radowało ich to tym barzi, iże co roz widzům hołda ludzi. Nostympno ôkazjo dopiyro na bezrok.

KUWERT WE AJSSZRANKU – MOGE ZRETOWAĆ ŻYWOBYCIÝ

We ajsszranku nojczyńści trzimie sie jodło. Wiadůmo, coby sie niý zepsuło. Taki ajsszrank moge jednako przydać sie tyż na co inkszego. Na co? Posuchejcie sami.

Coby spomůc retownikůw, kerzi niý dej losie, przijechaliby do noszego miynszkanio do retowanio nos, styknie wrazić kartka we kuwert do ajsszranku. Jak a na co?

Ano piyrwy na tyj kartce trza szkryfnůńć jake mielimy abo můmy niýmoce, jake lyki muszymy brać na nosze niýmocne ciało, eli můmy jake alergie abo co inkszego. Potyn trza ta kartka wrazić do kuwerty, kero idzie prosto do ajsszranku. Tako Kuwerta Żywobycio nojlepi coby

mioł kożdy synior, wto je chory, abo wto żyje sům.

20 januara we rudzkim Sztad Urzyndzie pokozano bůła tako ekstra kuwerta. szło ja dostać we Biurze Obsługi Mieszkańców, we Izbie Przyjęć godulskigo lazarytu ai půł tauzyna kopert trefiło do przedstowicieli rudzki Rady Syniorůw.

Jak wożno moge być to informacjo wiedzům nojlepi Ci, kerych udało sie dziynka tymu zretować, a chyba nojlepi same dochtory a medik retowniki. Jako sami godajům, coby kogoś ôdretować nojwożniyjszych je piyrszych poranoście minut. Przi tymu richtich wożne je, coby jak nojpryndzy dowiedzieć sie, jake niýmoce mioł poszkodowany a eli sie czymś lyczůł.

A chocioż zrobiyniý takij kuwerty samymu to je nojwyży poranoście minut, to tyn czos moge nům dać nostympne duge lata żywobycio. Beztuż spůminůmy. Styknie na kartce szkryfnůńć jake niýmoce můmy, a jako sie lyczymy, potyn wrazić ja do kuwerty. Ta zaś przipnůńć kaj na ajsszranku abo dobrze ulokować kajś rajn. Dbejcie ô swoje żywobyciý. Nawet tak.

 

Dodaj komentarz


Kod antyspamowy
Odśwież